卷一(3/18)

，往事方知是梦魂。

    春游遇美

    举头忽见东方白，起来闲坐独沉吟，正想梦中情与事，忽听前厅有客临。出见谁知非别客，乃系一个顶号相知李若云。白生一见忙呼坐，遂将前梦对他陈。若云听得深称异，就话：“梦寐原何有凭真？古云春梦多颠倒，哩下劝你抛开且莫论。我想今朝乃是清明节，该寻一地共游春。算来城北花溪上，寺观清幽远市尘，溪边有座湘妃庙，哩下踏青多少奉香人。唔好大家来去同游玩，庶唔虚负物华新。”见语白生称极好，就叫书童跟尾共抽身。

    轻举步，慢趋前，风光无地不堪怜。笑语林间欢酌酒，清歌花里弄朱弦。笑语见人围蹴鞠，又见罗裳轻卷试秋千。

    见人斗草穿芳径，又见紫骝嘶过绿杨烟。正系四时最好是三月，一路相逢美少年。芳景寻来看不尽，入眼花溪已在前。生共若云忙赶上，只见流水胡麻又一天。曲处转从栽竹径，乎来宽踏种花田。桥通对面楼藏树，路入前头路隔烟。闲行转到湘妃庙，石栏低倚共流连。只话又从此地观春景，唔想隔溪忽见一花船。载着如花人一簇，真系风流个个可人怜，摇来系在横塘曲，佢地就整衣妆共上船。企定有人轻说道：“我地拾翠如今往个边，总为前头有座花亭好，所以踏青人爱到流连。”

    二生举目来同看，只见柳眉花面各争妍：其间有系长披发，好似一片香云披绿肩；有系发鬓学梳新样髻，就畀花枝斜插衬金钿；春衣有系金为缕，有系冉冉春罗着紫烟，有系行时有系坐，佢就遮遮掩掩小亭前。自己睇来能惹恨，就中两个更堪怜。衣着一身都系白，上都系带紫云肩；头亦都系梳凤穗，就系青丝都亦正披檐；大家扶着香肩立，好似一双春玉倚风前；正系立当秋水花应妒，行过东风燕定怜。

    白生一见魂飘荡，惜玉情怀更觉牵，就阻若云低说道：“我地此行真亦不徒然！你睇池畔这双穿白个，唔止月中飞下两云仙！唔好大家行过垂杨岸，近些来去细观瞻。”若云带笑称：“来去，等我睇佢做乜咁貂蝉。”遂即扶肩同举步，轻轻行过绿杨边，藏身正欲来偷看，唔想惊动几个梅香美少年，齐声道：“有人来了，请众娇娇好下船。”此际二生闻此语。乘机直闯到亭前。吓得个群娇贵人家女，回身躲避各纷然。佢就共将扇底桃花面，欲露还遮最可怜。
本章还未完，请点击下一页继续阅读>>>